بەیانێک بەربەیانی ھات وەردی باخی دڵی ئەکرد
چرا و مۆمی کۆڕی ئەوین کۆرپەی دڵی تۆمار ئەکرد
قەڵەم ھات و نەھاتی خۆی دەنووسێت ودڵیش
لە ناو ژوانی گوڵ و بەھار کات و ساتێکی بەڕێ کرد
کە زانی داوی داناوە و لە بۆسە دا تاریکە شەو
گوڵ و بولبول بەبێ چرپە ماچی دەمی یەکیان ئەکرد
لەو بۆسە دا پەلێ ڕاچوو لە جەرگی پڕ خۆێنی ھەژار
کوا کەژاوەی ئەویندارێ، چ دڵدارێ پەژارەی کرد
مەگەر زینێ بێ و ڕابرێ و مەلھەمی زامی مەمێ کا
ئاشق دەردی گرانێ خۆی بە مەی ھێدی و ھێور ئەکرد
دەڵێن دنیا خەراباتە بێ سێبەری نەمام و گوڵ
لە باخ و خزمەتی گوڵدا کوڵی دڵم ھانای ئەبرد
وتم ھەی گوڵ بۆ نیشتیمان ڕامان و دوورە ئاسۆیەک
وتی ڕوونە نەمام و گوڵ، ھەموو ڕەنگێ چرۆی ئەکرد
دەمێ شین و دەمێ شایی ودەمێ کاروانن لە ڕێیە
ھەتڵە ئەبوو لێک ئەترازا و بە ساڵانێک وەدی ئەکرد
لەو ڕێیە سەخت و ھاڵۆزە گەلێ بەسەرھاتن ھەنە
کەچی پەندی پێشینانمان ھەتا نووکەش بە گوێ نەکرد
کوردستان ئەی خاکی گوڵ و ھزر و وەفا، کانگای ئەوین
نەڵێی دەرچوو بەجێمی ھێشت خۆشی لەمن بێبەری کرد
بە خشتێکی شێعری تاسەی کوردەواری ھێمن نابم
تەختی داگیرکەر وەرگەڕێ منی لە تۆ و تۆی لەمن کرد
خۆ فرمێسکی کاتی پیریم ھەموو ھاوار و ھاوڕێتن
ھەنووکەش و ھەمووجارێ بۆنی خاک و ئاڵام ئەکرد.